Morte di un amico e collega

Pagina 252

Cum, e Cilicia decedens, Rhodum venissem, et eo mihi de Quinti Hortensi morte adlatum, opinione omnium maiorem animo cepi dolorem. Nam et, amico amisso, cum consuetudine iucunda tum multorum officiorum coniunctione me privatum videbam et interitu talis auguris dignitatem nostri collegi deminutam dolebam. Augebat etiam molestiam quod in magna sapientium civium bonorumque penuria, vir egregius, alienissimo rei publicae tempore exstinctus, auctoritatis et prudentiae suae triste nobis desiderium reliquerat. Dolebam etiam quod non, ut plerique putabant, adversarium aut obtrectatorem laudum mearum, sed socium potius et consortem gloriosi laboris amiseram. Etenim, si in leviorum artium studio memoriae proditum est poetas nobiles poetarum equalium morte doluisse, quo tandem animo eius interitum ferre debui, cum quo certare erat gloriosius quam omnino adversarium non habere?

Oggi hai visualizzato 6.1 brani.
Ti ricordiamo che hai ancora a disposizione la visualizzazione di 8.9 brani.

Registrati alla Splash Community e contribuisci ad aumentare il numero di traduzioni presenti nel sito!