✔ Cum in hibernis Romani dies complures transissent frumentumque eo comportari Galba iussisset, subito per exploratores certior factus est ex ea parte vici, quam Gallis concesserat, omnes noctu discessisse montesque qui impenderent a maxima multitudine Sedunorum et Veragrorum teneri. Aliquot de causis acciderat, ut subito Galli belli renovandi legionisque opprimendae consilium caperent: primum quod legionem, detractis cohortibus duabus et absentibus compluribus, qui commeatus petendi causa missi erant, propter paucitatem despiciebant; deinde etiam quod propter iniquitatem loci, cum ipsi ex montibus in vallem decurrerent et tela conicerent, ne primum quidem impetum suum Romanos posse sustinere existimabant. Accedebat quod filios suos ab se abstractos obsidum nomine dolebant, et sibi persuasum habebant Romanos culmina Alpium occupare conari ut ea loca finitimae provinciae adiungerent.
