Capuani legatos ad Hannibalem oratum miserunt ut Capuam exercitum admoveret: nam ad eam oppugnandam novos exercitus scribi Romae rettulerunt. Quia id tam trepide nuntiabant, sibi maturandum esse Hannibal ratus, ne praevenirent Romani, profectus Arpis ad Tifata in veteribus castris super Capuam consedit. Inde Numidis Hispanisque ad praesidium simul castrorum simul Capuae relictis cum cetero exercitu ad lacum Averni per speciem sacrificandi, re ipsa ut temptaret Puteolos, descendit. Maximus, postquam Hannibalem Arpis profectum esse et regredi in Campaniam ei allatum est, nec die nec nocte intermisso itinere ad exercitum redit, et Ti. Gracchum ab Luceria Beneventum copias admovere, Q. Fabium praetorem – is filius consulis erat – ad Luceriam Graccho succedere iubet.
