✔ Caesar venit magnis itineribus in Nerviorum fines. Ibi ex captivis cognoscit quae apud Ciceronem gerantur, quantoque in periculo res sit. Tum cuidam ex equitibus Gallis magnis praemiis persuadet uti ad Ciceronem epistulam deferat. Hanc conscriptam Graecis litteris mittit, ne, intercepta epistula, nostra consilia ab hostibus cognoscantur. Monet equitem ut, si adire non possit, tragulam cum epistula deligata intra munitionem castrorum abiciat. In litteris scribit se cum legionibus profectum celeriter adfore. Gallus eques periculum veritus, ut erat praeceptum, tragulam mittit. Haec casu ad turrim adhaesit neque ab nostris biduo animadversa est; tertio die a quodam milite conspicitur, dempta ad Ciceronem defertur. Ille perlectam epistulam in conventu militum recitat maximaque omnes laetitia adficit. Tum fumi incendiorum procul videbantur; quae res omnem dubitationem adventus legionum expulit.
