Princeps Carthaginiensium Hanno opes suas ad occupandam dominationem intendit regnumque invadere, interfecto senatu, conatur. Cui sceleri sollemnem nuptiarum diem filiae suae legit, ut religione votorum nefanda commenta facilius tegerentur. Itaque plebi epulas in publicis porticibus, senatui in domo sua parat, ut, poculis veneno infectis senatum sine arbitris interficeret orbamque rem publicam facilius invaderet. Qua re, magistratibus per ministros prodita, scelus declinatum est. Hoc consilio praeventus, iterum servitia concitat statutaque rursus caedium die, cum denuo se proditum videret, timens iudicium, munitum quoddam castellum cum viginti milibus servorum armatis occupat. Ibi, dum Afros regemqueMaurorum concitat, capitur, virgisque caesus, efossis oculis et manibus cruribusque fractis, in conspectu populi occiditur; corpus verberibus lacerum in crucem figitur. Filii quoque cognatique omnes, etiam innoxii, supplicio traduntur, ne quisquam aut ad imitandum scelus aut ad mortem ulciscendam ex tam nefaria domo superesset.

da Giustino

Siamo spiacenti, per oggi hai superato il numero massimo di 5 brani
Registrandoti gratuitamente alla Splash Community potrai visionare giornalmente un numero maggiore di traduzioni!

Siamo spiacenti, ancora non è presente una traduzione di questo brano!

Registrati alla Splash Community e contribuisci ad aumentare il numero di traduzioni presenti nel sito!