Tullius Terentiae suae s.d. Quod nos in Italiam salvos venisse gaudes, perpetuo gaudeas velim. Sed perturbati dolore animi magnisque iniuriis, metuo ne id consilii ceperimus, quod non facile explicare possimus. Quare, quantum potes, adiuva; quid autem possis, mihi in mentem non venit. Quod in viam te des hoc tempore, nihil est. Et longum est iter et non tutum; et non video quid prodesse poteris, si veneris. Vale. S. pr. Nonas Novembr. Brundisio.
Tullius Terentiae suae s.d. S.V.B.E.E.V. Redditae mihi tandem sunt a Caesare litterae satis liberales et ipse opinione celerius venturus est dicitur. Cum constitero, te certiorem faciam utrum procedam obviam eum an expectem eum hic. Tabellarios mihi velim quam primum remittas. Valetudinem tuam cura diligenter. Vale. D. pridie Idus Sextiles. Brundisio.
