✔ Cicero cum candidatus, qui coqui filius habebatur coram eo suffragium ab alio peteret: «Ego quoque - inquit - tibi favebo». Idem cum Pompeius civitate Romana transfugam donasset: «Bellum hominem! - inquit - Gallis civitatem alienam donat, qui nobis nostram non potest reddere». Vibium Curium multum de annis aetatis suae mentientem redarguit Cicero: «Tum ergo, cum unã declamabamus non eras natus!» Idem Fabiae dicenti triginta se annos habere: «Verum est - inquit - nam hoc illam dicentem iam viginti annis audio». Cum Hortensius in iudicio Verris ei testem roganti dixisset: «Non intellego haec aenigmata», «Atqui debes - inquit - cum Sphingem domi habeas»; acceperat autem ille a Verre Sphingem aeneam magnae pecuniae. Cicero Carelliae scripsit reddens rationem, cur C. Caesaris tempora tam patienter toleraret: «Haec aut animo Catonis ferenda sunt aut Ciceronis stomacho».
