✔ Utrimque clamore sublato excipit rursus ex vallo atque omnibus munitionibus clamor. Nostri, omissis pilis, gladiis rem gerunt. Repente post tergum equitatus cernitur. Cohortes aliae adpropinquant: hostes terga vertunt. Fugientibus equites occurrunt. Fit magna caedes. Sedullus, dux et princeps Lemovicum, occiditur: Vercassivellaunus Arvernus vivus in fuga comprehenditur; signa militaria LXXIV ad Caesarem referuntur: pauci ex tanto numero se incolumes in castra recipiunt. Conspicati ex oppido caedem et fugam suorum, desperata salute, (Galli) copias a munitionibus reducunt. Fit protinus hac re audita ex castris Gallorum fuga. De media nocte missus equitatus noster novissimum agmen hostium consequitur; multi captivi fiunt atque occiduntur; reliqui ex fuga in civitates discedunt.
