Scipio Aemilianvs - Hispania pacata


Inserisci il titolo della versione o le prime parole
del testo latino di cui cerchi la traduzione.

Username Password
Registrati Dimenticata la password? Ricorda Utente
 
Scipio Aemilianvs - Hispania pacata

Viriathus in Hispania, primum ex pastore venator, ex venatore latro, mox iusti quoque exercitus dux factus, totam Lusitaniam occupavit, M. Vetilium praetorem, fuso eius exercitu, cepit, post quem C. Plautius preoter nihilo felicius rem gessit. Tantumque terroris in hostis intulit ut adversus eum consulari opus esset et duce et exercitu.
Q. Caecilius Metellus proconsul Celtiberos cecidit, et a Q. Fabio proconsule magna pars Lusitaniae, expugnatis aliquot urbibus, recepta est.
Q. pompeius consul in Hispania Termestinos subegit. Cum iisdem et Numantinis pacem - a populo Romano infirmatam - fecit. Q. Fabius proconsul rebus in Hispania prospere gestis labem imposuit, pace cum Viriatho aequis condicionibus facta.
Viriathus a proditoribus, consilio Servilii Caepionis, interfectus est et ab exercitu suo multum comploratus ac nobiliter sepultus, vir duxque magnus et per quattuordecim annos quibus cum Romanis bellum gessit frequentius superior.
P. Cornelio Nasica, cui cognomen Serapio fuit, et Decimo Iunio Bruto consulibus dilectum habentibus, in conspectu tironum res saluberrimi exempli facta est: nam C. Matienus accusatus est apud tribunos plebis 'quod exercitum ex Hispania deseruisset' damnatusque sub furca diu virgis caesus est et sestertio nummo veniit.
M. Popilius a Numantinis, cum quibus pacem factam irritam fieri senatus censuerat, cum exercitu fusus fugatusque est.
C. hostilio Mancino consule sacrificante pulli ex cavea evolaverunt; conscendenti deinde navem, ut in Hispaniam proficisceretur, accidit vox "Mane, Mancine!" Quae auspicia tristia fuisse eventu probatum est: Victus enim a Numantinis et castris exutus, cum spes nulla servandi exercitus esset, pacem cum his fecit ignominiosam, quam ratam esse senatus vetuit. Quadraginta milia Romanorum ab quatturo milibus Numantinorum victa erant!
D. Iunius Brutus in Hispania ulteriore feliciter adversus Gallaecos pugnavit. Dissimili eventu M. Aemilius Lepidus proconsul adversus Vaccaeos rem gessit, clademque similem Numantinae passus est. Ad exsolvendum foederis Numantini religione populum Mancinus, cum huius rei auctor fuisset, deditus Numantinis non est receptus.
Cum bellum Numantinum vitio ducum non sine pudore publico duraret, delatus est ultro Scipioni Africano a senatu populoque Romano consulatus. Quem cum illi capere ob legem, quae vetabat quemquam iterum consulem fieri, non liceret, sicut priore consulatu legibus solutus est.
Scipio Africanus Numantiam obsedit, et corruptum licentia luxuriaque exercitum ad severissimam militiae disciplinam revocavit: omnia deliciarum instrumenta recidit, duo milia scortorum e castris eiecit, militem cotidie in opere habuit et triginta dierum frumentum ac septenos vallos ferre cogebat. Aegre propter onus incedenti dicebat: "Cum gladio te vallare scieris, vallum ferre desinito!" Quem militem extra ordinem deprehendit, si Romanus esset, vitibus, si extraneus, virgis cecidit. Iumenta omnia, ne exonerarent militem, vendidit. Saepe adversus eruptiones hostium feliciter pugnavit. Scipio amplissima munera missa sibi ab Antiocho, rege Syriae, cum celare aliis imperatoribus regum munera mos esset, pro tribunali 'accepturum se esse' dixit, omniaque ea questorem referre in publicas tabulas iussit: 'ex his se viris fortibus dona esse daturum.'
Cum undique Numantiam obsidione clausisset et obsessos fame videret urgeri, hostes qui pabulatum exierant vetuit occidi, quia diceret 'velocius eos absumpturos frumenti quod haberent, si plures fuissent.'
Numantini fame coacti ipsi se per vicem traiecentes trucidaverunt. Captam urbem Scipio Africanus delevit et de ea triumphavit quarto decimo anno post Carthaginem delatam.
da Livio


Oggi hai visualizzato brani.
Ti ricordiamo che hai ancora a disposizione la visualizzazione di 15 brani.

È severamente vietata qualsiasi copia o riproduzione anche parziale di traduzioni per uso pubblico. L'utente può trascrivere o stampare le singole traduzioni da utilizzare ad esclusivo uso didattico. Ogni tentativo di violazione dei sistemi atti a proteggere il materiale contenuto nel sito sarà perseguito a norma di legge.

La Traduzione può essere visionata su Splash Latino - http://www.latin.it/versione/25184

[mastra] - [2014-07-20 11:44:38]
Registrati alla Splash Community e contribuisci ad aumentare il numero di traduzioni presenti nel sito!

Modalità mobile